Müharibə iştirakçısı İH-dən çıxdıqdan sonra intihar edib?

Sabirabad rayonu sakini, Vətən müharibəsi iştirakçısı, 1986-cı il təvəllüdlü Maşallah Manafov Cavad kəndində özünü asaraq intihar edib.

Onun Sabirabad rayon İcra Hakimiyyətinin binasından çıxdıqdan sonra intihar etdiyi iddia olunub.

Məsələ ilə bağlı Axar.az-a Sabirabad rayon İcra Hakimiyyətindən bildirilib ki, intihar hadisəsindən əvvəl M.Manafov qəbulda olmayıb:

“Rəsmi olaraq İcra Hakimiyyətinə gələn vətəndaşlar qeydiyyata alınır. Bu gün icra başçısının qəbul günü olmasına baxmayaraq, həmin vətəndaş bura müraciət etməyib. İcra Hakimiyyətinin bu məsələdə adının hallanması isə müəmmalıdır. Amma M.Manafov bizə fevral ayında işlə təmin olunmaqla bağlı müraciət edib. İcra Hakimiyyəti onu rayon ərazisində “Əmin” adlı mağazada işə düzəldib”.

İH-dən qeyd edilib ki, Vətən müharibəsi iştirakçısının özünü inzibati binanın qarşısında öldürdüyü də iddia edilib:

“O, həyatına kəndə məxsus əkin sahəsində son qoyub. Hazırda faktla bağlı Sabirabad Rayon Prokurorluğunda araşdırma aparılır”.