Hadisə

Təcili yardım həkiminin iynə vurduğu 43 yaşlı kişi öldü

21 Oktyabr 2025 17:43

Sumqayıt şəhərində 1982-ci il təvəllüdlü Akif Abgül oğlu Baxşıyev qəfil dünyasını dəyişib.

Publika.az Report-a istinadən xəbər verir ki, hadisə şəhərin 41 "A" məhəlləsində baş verib.

A.Baxşıyev gecə saatlarında özünü pis hiss edərək, mədə ağrılarından şikayətlənib. Ailə üzvləri onun vəziyyətinin pisləşdiyini görərək, təcili tibbi yardıma müraciət ediblər. Yaxınlarının iddiasına görə, A.Baxşıyev həkimlər tərəfindən iynə vurulduqdan az sonra ölüb.

Məsələ ilə bağlı TƏBİB-dən bildirilib ki, 21.10.2025-ci il tarixində saat 00:00 radələrində Respublika Təcili və Təxirəsalınmaz Tibbi Yardım Mərkəzinə Sumqayıt şəhəri ərazisindən təcili çağırış daxil olub:

“Dərhal təcili tibbi yardım briqadası çağırış ünvanına cəlb olunub. Təcili tibbi yardım briqadası tərəfindən 1983-cü il təvvəllüdlü (kişi cinsli) şəxsə kəskin koronar sindrom, kardiogen şok diaqnozu qoyulub və ilkin tibbi yardımın həyata keçirilməsinə baxmayaraq həkim yanında ölüm qeydə alınıb”.