Hadisə

Məhkəmə binasına butulka atan şəxs cərimələndi

22 Noyabr 2025 14:11

Bakı İnzibati Məhkəməsinin binasına butulka atan şəxs inzibati məsuliyyətə cəlb olunub.

Publika.az Teleqraf-a istinadən xəbər verir ki, hadisə Nərimanov rayonunda yerləşən məhkəmənin inzibati binasında baş verib.

Bakı şəhər sakini, 1973-cü il təvəllüdlü Aqil Səlimov (ad-soyad şərti verilib – red.) Bakı İnzibati Məhkəməsinin binasına butulka atıb.

Bu səbəbdən həmin şəxs Nərimanov Rayon Polis İdarəsinin 18-ci Polis Şöbəsinə aparılıb. Onun barəsində İnzibati Xətalar Məcəlləsinin 510-cu (xırda xuliqanlıq) maddəsi ilə protokol yazılıb.

İş üzrə ifadə verən təqsirləndirilən şəxs özünü ittiham üzrə təqsirli bilib. O bildirib ki, hadisə vaxtı içkili olub və həmin butulkanı məhkəmənin həyətinə atıb:

“Törətdiyim əməlindən peşmanam. Bu kimi hallara yol verməyəcəm. Məhkəmədən 2-ci qrup əlil olmağımın nəzərə almasını xahiş edirəm”.

Nərimanov Rayon Məhkəməsinin qərarı ilə o, 75 manat miqdarında inzibati qaydada cərimə olunub. O, dərhal məhkəmə iclas zalından azadlığa buraxılıb.