Mahaçqalada sel çoxmərtəbəli binanı belə ucurdu - Video

Mahaçqalada çoxmərtəbəli binanın uçmasının əsas səbəblərindən biri xaotik tikinti ola bilər.

Publika.az xəbər verir ki, bu barədə şəhər rəhbəri Cambulat Salavov öz "Telegram" kanalında bildirib.

Onun sözlərinə görə, çay yatağının yaxınlığında uçan bina, eləcə də potensial risk zonasında olan dörd ev fərdi mənzil tikintisi üçün nəzərdə tutulmuş torpaq sahəsində inşa edilib.

O əlavə edib ki, yerli sakinlər məhkəmə yolu ilə yaşayış sahələrini qanuniləşdirə bilsələr də, zəruri texniki sənədlərin olmaması səbəbindən binaların özləri çox mənzilli ev kimi şəhərin balansına götürülməyib.

Hadisə 5 apreldə baş verib. Yerli sosial şəbəkə səhifələri dağıntının bir-birinə bitişik bir neçə yaşayış binasına qismən təsir etdiyini yazıb.

Fövqəladə Hallar Nazirliyi daha sonra dəqiqləşdirib ki, qruntun yuyulması nəticəsində altımərtəbəli çoxmənzilli binaya bitişik üçmərtəbəli tikili uçub. Xilasedicilər tərəfindən sakinlərin təcili təxliyəsi həyata keçirilib: təxminən 300 nəfər, o cümlədən 100-ə yaxın uşaq təhlükəsiz yerə köçürülüb.

Hüseyn İbadlı