RİO-2016: Təşkilatçılar bilet satışından məmnundur

XXXI Yay Olimpiya Oyunlarının başlamasına 3 həftə vaxt qalıb. Artıq bilet satışlarında da artım hiss olunmağa başlayıb.

Publika.az xəbər verir ki, Olimpiadanın Təşkilat Komitəsi biletlərin 70 faizinin satıldığını bildirib. Qeyd edək ki, Olimpiya Oyunları üçün ilk bilet satışı məntəqəsi iyunun 20-də Rio-de-Janeyroda açılıb. Bundan əvvəl isə yerli əhali biletləri yalnız Rio-2016-nın Təşkilat Komitəsinin rəsmi saytı vasitəsi ilə ala bilirdi. Bu da yalnız braziliyalılara şamil olunurdu. Kassada isə milliyyətindən asılı olmayaraq hər kəs bilet ala bilər. Eyni zamanda, Təşkilat Komitəsində qeydiyyatdan keçmiş müxtəlif şirkətlərin vasitəçiliyi ilə dünyanın hər yerindən onlayn bilet almaq mümkündür.

“70 faiz bilet satışı bizim gözlədiyimiz qrafiki üstələyir. Bu, yaxşı haldır. Hər cümə axşamı yeni biletlər satışa çıxır. Məqsədimiz qalan 1,7 milyon biletin hamısını satmaqdır”, - deyə təşkilat komitəsinin nümayəndəsi bildirib.

Rio-2016 avqustun 5-21-də keçiriləcək. Bu, Cənubi Amerikada təşkil olunacaq ilk Olimpiadadır. Paralimpiada isə sentyabrın 7-18-i aralığında olacaq.

Pərviz Hikmət