İdman

Çakıra Çempionlar Liqasında YENİ TƏYİNAT

5 Mart 2019 05:52

Çempionlar Liqasının 1/8 final mərhələsinin cavab oyunları üçün hakim təyinatları məlum olub.

Publika.az UEFA-nın saytına istinadən xəbər verir ki, “Mançester Yunayted” – PSJ matçını Sloveniyadan olan hakimlər briqadası idarə edəcək. Görüşün baş hakimi Damir Skomina olacaq. Ona Yura Praprotnik və Robert Bukan kömək edəcək. Massimiliano İratti VAR hakimi, onun köməkçisi isə Marko Qvida olacaq. Oyunda dördüncü hakim funksiyasını Matey Yuq yerinə yetirəcək. Komandalar arasındakı ilk görüşdə PSJ səfərdə 2:0 hesabıyla qələbə qazanıb.

“Portu” – “Roma” matçının idarəçiliyi isə türklərə tapşırılıb. Oyunun baş hakimi Cüneyt Çakır olacaq. Ona Bahattin Duran və Tarık Engün kömək edəcək. Matçın VAR hakimi Simon Marçinyak, köməkçisi isə Pavel Gil olacaq. Oyunun dördüncü hakimi funksiyasını Halis Özkahya yerinə yetirəcək. Komandalar arasındakı ilk görüşdə “Roma” 2:1 hesabıyla qələbə qazanıb.

Hər iki qarşılaşma martın 6-da, saat 00:00-da start götürəcək.