Tokio-2020 Yay Olimpiya Oyunları təxirə salına bilər

Yeni tip koronavirusla bağlı təhlükə artsa, 2020 Yay Olimpiya Oyunları təxirə salınacaq.

Publika.az xəbər verir ki, bunu Tokio 2020 Təşkilat Komitəsinin İdarə Heyətinin üzvü Haruyuki Takahaşi deyib.

Yaponiyanın paytaxtı Tokioda 24 iyul-9 avqust tarixlərində keçirilməsi planlaşdırılan oyunlarda koronavirus epidemiyasının genişlənməsi təqdirində görüləcək tədbirlərlə bağlı ABŞ mediasına açıqlama verən Takahaşi olimpiadanın ləğv olunacağını düşünmədiyini dilə gətirib: “Ən məntiqli seçim təxirə salınması ola bilər. Beynəlxalq Olimpiya Komitəsi (IOC) oyunların maliyyə həcmini diqqətə alaraq ləğv kartını seçimlər arasına əlavə etməz”.

O, oyunların tamaşaçısız keçirilməsinin də iqtisadi baxımdan çox ağır nəticələrinin olacağını qeyd edib.

Bu açıqlamadan sonra Tokio 2020 Təşkilat Komitəsinin İdarə Heyəti təxirə salınma və ya ləğvlə bağlı seçimlərin hazırda gündəmdə olmadığını, hazırlıqların planlaşdırıldığını elan edib.

Qeyd edək ki, Azərbaycan da Tokio-2020 Yay Olimpiya Oyunlarında geniş tərkibdə iştirak etməyi planlaşdırır.

Zümrüd