“Ferrari”nin tempinə təəccübləndik - Marko

“Red Bull” şirkətinin idman məsləhətçisi Helmut Marko düşünür ki, hazırda həm dözümlülük, həm də təkərə nəzarət etməkdə “Ferrari”dən geri qalırlar.

Publika.az xəbər verir ki, “Red Bull” komanda olaraq Albert Parkda “Ferrari”yə qarşı heç bir varlıq göstərə bilməyib. Üstəlik, Maks Ferstappen problem yaşayaraq mübarizəni dayandırıb. Niderlandlı sürücü hazırda lider Şarl Leklerdən 46 xal geridədir.

Helmut Marko: “Sebastyan Fettel ilə 60 xal geridən gələrək çempion olduğumuz mövsümü xatırlayıram. Hazırda mübarizəyə təsir edən 2, ya da 3 amil var. Əvvəlcə keçən il rastlaşmadığımız etibarlılıq problemləri ilə qarşılaşırıq. Ancaq Albert Parkda “Ferrari”dən çox geri qalırdıq. Təkərləri yeyilmədən yarışı qazandılar. Maks aranı bağlamaq istəyəndə Lekler asanlıqla cavab verirdi. Medium təkərlərlə çox çarəsiz idik. “Mercedes” belə bəzən bizdən sürətli idi. Hard təkərdə daha yaxşı görünsək də, “Ferrari” başqa sinifdə idi. Onları ancaq təbrik edə bilərəm. Onların tempinə təəccübləndik”.