Həbib Ronaldo ilə İnfantinonu hədələdi və... - VİDEO

UFC-nin yüngül çəki dərəcəsində keçmiş çempionu Həbib Nurməhəmmədov futbol üzrə 2026-cı il dünya çempionatının bir oyununa iki VIP-biletin sahibi olub.

Publika.az xəbər verir ki, hazırda Dubayda Dünya İdman Sammiti keçirilir. Tədbirdə idman dünyasının bir çox ulduzları ilə yanaşı, Həbib Nurməhəmmədov da iştirak edib. Keçmiş MMA döyüşçüsü "Madinat Jumeirah" kompleksinin zalında ön sırada əyləşərkən səhnədə FIFA prezidenti Canni İnfantino onunla birlikdə olan əfsanəvi braziliyalı hücumçu Ronaldo Nazarioya iki biletin veriləcəyi şanslı şəxsi seçməyi təklif edib.

Bu seçim Nurməhəmmədovun üzərinə düşüb. O, Ronaldonu fəal şəkildə özünə səs verməyə çağırıb və hətta zarafatla braziliyalını hədələyib. Ronaldo buna cavab olaraq “Həbib artıq məni döyür” deyə zarafat edib. İnfantino isə “Bu, ən təhlükəsiz variantdır” sözləri ilə braziliyalını dəstəkləyib.

Səhnəyə çıxan Həbib İnfantinoya müraciət edərək biletlərin VIP olub-olmayacağını soruşub: “Mən artıq adi biletlər almışam. Mənə VIP lazımdır, zəhmət olmasa”, - deyə Nurməhəmmədov qeyd edib. FIFA prezidenti isə idmançıya bu xahişi yerinə yetirəcəyinə söz verib.

Heybət