Millinin üzvünə bir il həbs cəzası verildi: Görün nə edib

Misir millisinin yarımmüdafiəçisi Ramazan Sobhi təhsil fırıldaqçılığı işində təqsirli bilinib.

Publika.az xəbər verir ki, “The Straits Times” qəzetinin verdiyi məlumata görə, Sobhi iyul ayında Türkiyədəki mövsümöncəsi təlim-məşq toplanışından qayıdarkən rəsmi sənədləri saxtalaşdırmaq və Giza əyalətindəki özəl turizm və otel idarəetməsi institutunda imtahan vermək üçün başqa bir şəxsdən istifadə etmək ittihamları ilə həbs olunub.

Çərşənbə axşamı, 30 dekabr tarixində Giza Cinayət Məhkəməsi 28 yaşlı futbolçunu və ikinci təqsirləndirilən şəxsi məcburi əməyə cəlb etməklə bir il həbs cəzasına məhkum edib.

Üçüncü təqsirləndirilən şəxs bəraət alıb, qaçaq olan dördüncü təqsirləndirilən şəxs isə qiyabi olaraq 10 il həbs cəzasına məhkum edilib.

Həbs cəzasından əlavə, Sobhi noyabr ayında İdman Arbitraj Məhkəməsi tərəfindən təsdiqlənmiş antidopinq qayda pozuntusuna görə dörd illik diskvalifikasiya ilə üzləşib.

Sobhi Misir millisində 37 oyun keçirib. Yarımmüdafiəçi həmçinin Premyer Liqada “Stoke Siti” və “Haddersfield” klublarında da oynayıb.