İngiltərə nəhəngi ulduz futbolçunun transferindən imtina etdi: Səbəb nədir?

“Tottenhem” Rahim Sterlinqin transferi uğrunda mübarizədən çəkilib.

Publika.az xəbər verir ki, İngiltərə millisinin sabiq ulduzu “Çelsi” ilə müqaviləni qarşılıqlı razılaşma əsasında vaxtından əvvəl ləğv etdikdən sonra azad agent statusu almıb. Sterlinq pulsuz əldə oluna bilsə də, “mahmızlar”ın rəhbərliyi danışıqları davam etdirməmək qərarına gəlib.

Jurnalist Alasder Qoldun məlumatına görə, əsas maneə 31 yaşlı futbolçunun maliyyə tələbləri olub. Sterlinq “Çelsi”də çıxış edərkən həftəlik təxminən 325 min funt sterlinq qazanırdı.

Oyunçunun maaşını azaltmağa hazır olmasına baxmayaraq, tələb etdiyi məbləğ yenə də “Tottenhem”in maaş strukturu üçün, xüsusilə 30 yaşdan yuxarı futbolçu baxımından, xeyli yüksək olub.

Sterlinq üçün vəziyyət daha da çətinləşir. O, ailəsinə görə Londonda qalmaq istəyirdi və bu baxımdan “Tottenhem” ideal variant kimi görünürdü.

Lakin artıq həm “mahmızlar”, həm də maliyyə tələblərindən çəkinən “Napoli” onun xidmətlərindən imtina etdiyinə görə, vingerin gələcəyi qeyri-müəyyən olaraq qalır. Hazırda karyerasını Səudiyyə Ərəbistanında və ya MLS-də davam etdirmək variantları nəzərdən keçirilir, çünki Avropada təcrübəli ingilis futbolçunun maliyyə ambisiyalarını qarşılayacaq klub sayı azdır.