İdman

Hemilton və Kardaşyanın macərası təsdiqləndi: İlk dəfə ictimaiyyət qarşısına çıxdılar - FOTOLAR

9 Fevral 2026 13:04

"Formula-1" üzrə yeddiqat dünya çempionu Lyuis Hemilton və Kim Kardaşyan ilk dəfə ictimaiyyət qarşısında birlikdə görünüblər.

Publika.az xəbər verir ki, ulduz cütlük bazar günü "Levi’s Stedyum"da keçirilən Superboulu birlikdə izləyib.

Kim və Lyuis “Sietl Sihoks” ilə “Nyu-İnqlend Patroits” arasındakı oyunu tribunadan izləyərkən kameralara tuş gəliblər.

45 yaşlı teleulduz, SKIMS brendinin qurucusu Kim Kardaşyan və 41 yaşlı britaniyalı “Formula-1” pilotu Lyuis Hemilton olduqca rahat görünür, bir-birlərindən açıq şəkildə zövq alırdılar. Kameralar dəfələrlə bu cütlüyü kadra alıb, hətta görüntülərdən biri sosial şəbəkələrdə viral olub və geniş müzakirələrə səbəb olub.

Peşəkar dodaqoxuyan Nikola Hiklinqin sözlərinə görə, Hemilton söhbət zamanı Kimə onu anası ilə tanış edəcəyinə söz verib. "Daily Mail"in yazdığına görə, pilotun “Mən hər kəsi anamla tanış etmirəm. Sən mütləq onunla tanış olacaqsan, bir gün. O, səni görmək üçün çox səbirsizlənir”, - dediyi iddia olunur.

Ekspert bildirib ki, həmin an Kardaşyanın həyəcanlandığı hiss olunub. O, yerində tərpənib, üzünü əli ilə örtüb və qısa şəkildə “Okey” cavabını verib.

Bədən dili üzrə mütəxəssis Cudi Ceyms isə qeyd edib ki, Kim əvvəlcə maksimum maraq nümayiş etdirib. O, diqqətlə Lyuisə baxıb və azca arxaya söykənib ki, bu da Hemiltonun üzündə məmnunluq ifadəsi yaradıb. Pilot gülümsəyib və açıq-aşkar zövqlə danışıb. Daha sonra isə Kim davranışını kəskin dəyişib, baxışlarını yayındırıb, saçlarına toxunub və sanki həmsöhbətindən gizlənib.

“Bu, klassik flörtdür. Əvvəl maraq, sonra məsafə. Bu üsul qarşı tərəfi qarşılıqlı hisslərə əminlik axtarmağa vadar edir”, – deyə Ceyms izah edib.

Ekspert həmçinin əlavə edib ki, Kimin jestləri Hemiltonu çox layiqli bir seçim kimi gördüyünü və onunla ictimaiyyət qarşısına çıxmağa qarşı olmadığını göstərir.

Cütlüyün oyunda birlikdə görünməsi müzakirələr üçün yeganə səbəb olmayıb. Bundan cəmi bir neçə gün əvvəl Kim və Lyuis Böyük Britaniyanın Kotsuolds bölgəsində yerləşən, dünya ulduzlarının sevimli istirahət məkanlarından sayılan dəbdəbəli "Estelle Manor" otelinə birgə giriş edərkən görüntülənmişdilər.

Hazırda Kardaşyan və Hemilton münasibətləri ilə bağlı rəsmi açıqlama verməyiblər.

Publika.az