Məşhur klubun qadın formaları ilə bağlı qalmaqal: Cinsi istismar olunurlar?

“Roma”nın qadın komandasının ətrafında matçlardan sonra oyun formalarının satışı ilə bağlı qalmaqal yaranıb.

Publika.az xəbər verir ki, “OneFootball”-un məlumatına görə, azarkeşlər futbolçuların formalarının ayrı-ayrı hissələrinə şübhəli dərəcədə yüksək maraq göstərilməsindən narazıdırlar.

Forma nümunələrini tam qanuni şəkildə, klublarla əməkdaşlıq edən xüsusi “MatchWornShirt” platforması vasitəsilə əldə etmək mümkündür. Matçlardan sonra xidmətin nümayəndəsi oyunçuların imzalı dəstlərini toplayır və onlar hərraca çıxarılır. Lotu ən yüksək məbləğ təklif edən şəxs qazanır.

Lakin azarkeşlərin diqqətini bir məqam cəlb edib: “Roma” futbolçularının şortları futbolkalarla müqayisədə altı dəfə baha qiymətə satılıb. Bu isə sosial şəbəkələrdə tənqid dalğasına səbəb olub. Azarkeşlərin bir qismi bu tendensiyanın idmançı qadınların seksualizasiyası kimi göründüyünü bildirib.

Əlavə narazılıq doğuran məqam isə kolleksiyaçıların daha çox gənc oyunçuların formalarına yüksək məbləğ təklif etməsi, təcrübəli futbolçuların formalarına isə marağın nisbətən zəif olmasıdır. Bəzi hallarda bir lot üçün təklif olunan məbləğ 500 avroya qədər yüksəlib.