Qurban Qurbanov: “Futbolçularım sona kimi oyundan qorxmadılar”

“Hər oyun bizim üçün böyük təcrübə oldu. Böyük klublara, fərqli oyun sistemində oynayan komandalara qarşı çıxış etdik. İngilis komandalarına qarşı oynamaq böyük təcrübə idi”.

Publika.az xəbər verir ki, bu sözləri “Qarabağ”ın baş məşqçisi Qurban Qurbanov UEFA Çempionlar Liqasının pley-off mərhələsində İngiltərədə “Nyukasl”a qarşı keçirdikləri cavab oyunundan sonra mətbuat konfransında deyib. Təcrübəli mütəxəssis turnirdəki çıxışına görə komandasına təşəkkürünü bildirib

“Komandama təşəkkür edirəm, çox uzun və maraqlı mövsüm keçirdilər. Hər birindən oyuna, göstərdikləri performansa görə çox razıyam. Bu gün də son oyunumuzda maksimum yaxşı tərəfdən özlərini göstərdilər. Baxmayaraq ki, Bakıdakı oyundan sonra komandanı psixoloji hazırlamaq çətin idi, sona kimi oyundan qorxmadılar”.

Qurban Qurbanov “Nyukasl” azarkeşlərinin oyun boyu onlara dəstək olduğunu da vurğulayıb:

“Nyukasl” azarkeşlərinə təşəkkür edirəm. Bəzən bizi də alqışlayırdılar, vurduğumuz qola əl çalırdılar. Hətta Bakıya gələn azarkeşlər də çox razı qalmışdılar. Ümumiyyətlə, Bakından pozitiv notlarla qayıtmışdılar”.

Baş məşqçi gələcək barədə də fikirlərini bölüşüb:

“Futbolçular həm fiziki, həm də psixoloji cəhətdən çox yükləndilər. Qarşıdakı aylarda və illərdə daha nələr edə biləcəyimizi düzgün düşünməliyik. İstərdim ki, gələcəkdə daha yaxşı oyunlar keçirək və mümkün qədər özümüzü daha yaxşı tərəfdən göstərək”.

Qeyd edək ki, komandalar arasında Bakıda keçirilə ilk oyunda “Nyukasl” 6:1 hesabı ilə qalib gəlib.

Heybət