"Qarabağ" futbolçularını yalnız bu halda sata bilər - Tanınmış menecer açıqladı

"Kobud səslənsə də, "bazar" olmalıdır. Alıcı olmalıdır ki, "satım, yoxsa satmayım" sualı ətrafında fikirləşəsən".

Bu sözləri Publika.az-a açıqlamasında tanınmış futbol meneceri Tural Əsgərov "Qarabağ"ın yaxın vaxtlarda futbolçu satma ehtimalını dəyərləndirərərkən deyib. Ağdam təmsilçisinin transfer fəaliyyətinə yaxın olan Əsgərov mövcud vəziyyətdə transfer pəncərəsi açıq olan ölkələrin klublarının (ABŞ və Asiya ölkələri) Azərbaycan çempionunun futbolçularına təklif göndərmə ehtimalı barədə danışıb.

O, maliyyə baxımından cəlbedici təklif olmayacağı halda "Qarabağ"ın oyunçularını satmayacağını düşünür:

"Bəzi ölkələrdə transfer pəncərəsi açıq olsa belə, satan tərəf "Qarabağ" olacaqsa, Ağdam klubu üçün "pəncərə" bağlıdır. Hansısa oyunçu satılsa, yaya kimi əvəzlənə bilməyəcək. Hesab edirəm ki, çox ciddi, "yox" deyilməyəcək pullar olmazsa, "Qarabağ" indi futbolçu satmamağa çalışacaq.

Bilirsiniz, indi çempionatda da vəziyyət gərgindir. Deyək ki, Kamilo Durana təklif gəldi. Onu necə satmaq olar? Komanda bir hücumçunun - Musa Qurbanlının ümidinə qalacaq. Bir neçə mövqedə ciddi rəqabət yoxdur, onu daha da azaltmaq düzgün olmayacaq. Ən azı yaya kimi "Qarabağ"dan hansı futbolçunun gedəcəyinə inanmıram".

Qeyd edək ki, Ağdam klubunun bəzi futbolçuları transfer pəncərəsi açıq ölkələrdən olan bir sıra klubların maraq dairəsindədir.

Heybət