Paşinyandan ayrılan Akopyanın vida paylaşımı: Məni təhqir etməyin - VİDEO

Xəbər verdiyimiz kimi, Ermənistanın baş naziri Nikol Paşinuyanın həyat yoldaşı Anna Akopyan ayrıldıqlarını rəsmən elan edib.

Publika.az xəbər verir ki, Akopyan bununla bağlı “facebok”da paylaşım edərək bir sıra məqamlara aydınlıq gətirib:

“Artıq qeyd etdiyim kimi, Baş nazir Nikol Paşinyanla evliliyim başa çatdı. Rəsmi nikahdan bəhs etdiyim üçün bir az çaşqınlıq yarandı. Bunu başqa nikahımız olmadığı üçün dedim. Bu gün, 25 fevral (qeyd edək ki, bu gün 27 fevraldır; video, ehtimal ki, iki gün əvvəl çəkilib və indi yayılıb - red.), hökumət iqamətgahını tərk edirəm.

Lakin yaxın gələcəkdə taksi sürücülərinin və ictimai nəqliyyatda olan müxtəlif naməlum şəxslərin mənim haqqımda, xüsusən də guya bu evi necə "yerlə yeksan" edib özümlə apardığım barədə hər cür məlumatı inamla yayacağı gözlənildiyi üçün sizə bir neçə faktı şəxsən bildirməyi zəruri hesab edirəm.

Birinci fakt: Mənim evim yoxdur. İpoteka ilə aldığımız ev hələ tikinti mərhələsində olarkən alınıb. Buna görə də kirayə mənzilə köçəcəyəm. Əgər kimsə mənə dollar milyonçusu olduğumu, dollarla ofşor hesablarımın, bilmirəm, saraylarımın və sair olduğunu desə, evin satışından bank hesabımda bir qədər pul qaldığını qeyd etmək lazımdır - dəqiq məbləği xatırlamıram, çünki heç vaxt araşdırmağa vaxt ayırmıram; bir hissəsi şəxsi ehtiyaclarıma xərclənib. Həmçinin "Mənim Addımım" Fondundakı maaşımdan yığdığım vəsaitlər də var.

Bunu xatırlayıram, çünki hər hesab açanda 5 milyon dram görürəm. Düşünürəm ki, bu, dolanışığım üçün kifayətdir. Maşınım yoxdur və təbii ki, dövlət təhlükəsizliyim də olmayacaq. Ona görə də, məni Yerevanın küçələrində tək gəzdiyimi görsəniz, xahiş edirəm təəccüblənməyin və həmçinin xahiş edirəm ki, məni təhqir etməyin, çünki son səkkiz ildə artıq kifayət qədər təhqir eşitmişəm.

"Mənim Addımım" Fondunun icraçı direktoru vəzifəsində işləməyə davam etmək istəyirəm, çünki bu, çox ehtiyac duyduğum maaşlı bir vəzifədir. Lakin düşünürəm ki, təkcə istəyim kifayət etməyə bilər. Bundan əlavə, Korrupsiyaya Qarşı Mübarizə Komitəsi ilə jurnalist arasında dünənki söhbətə əsasən, "Mənim Addımım" Fondunun icraçı direktoru kimi cinayət məsuliyyətinə cəlb oluna bilərəm. Həyat belədir - bu, bir ehtimaldır. Görərik".

Tural