"Qarabağ"ın kolumbiyalı "Neymar"ı: Vətənində hamı ondan danışır

"Qarabağ"ın futbolçusu Kamilo Duran son günlərin ən çox müzakirə edilən oyunçularından biridir. Kolumbiyalı forvard həm Azərbaycanda, həm Avropada, həm də vətənində müzakirə olunur.

Onun Çempionlar Liqasında Ağdam klubu ilə uğurlu çıxışı diqqətdən yayınmır. Turnirdəki məhsuldarlığı və oyunu ilə müzakirələrə səbəb olub.

Yayda heç kimin tanınmadığı 24 yaşlı Duran artıq ölkəsində xeyli məşhurdur. Kolumbiya mətbuatı onunla bağlı yazılar dərc etməyə başlayıb. Onlardan biri "noticiascaracol.com" saytının xanım yazarı Marianella Ramos Kastro tərəfindən qələmə alınıb.

Publika.az həmin məqaləni tərcümə ilə təqdim edir:

"Kolumbiyalı hücumçu Camilo Duran vətənində peşəkar futbolda kifayət qədər şans tapa bilməsə də, gözlənilmədən beynəlxalq arenada parlayaraq diqqət mərkəzinə düşüb. O, "Qarabağ" klubunun heyətində UEFA Çempionlar Liqası turnirində 5 qol vuraraq böyük səs-küy yaradıb. Onun son qolu pley-off mərhələsinin cavab oyununda "Newcastle United" ilə matçda vurulsa da, komandası 2:3 hesabı ilə məğlub olub. Duran turnirdə eyni zamanda "Benfika", "Ayaks" və "Ayntraxt Frankfurt" kimi güclü rəqiblərin qapısına yol tapıb.

10 fevral 2002-ci ildə Santa Marta şəhərində kasıb bir ailədə doğulan futbolçu Avropadakı çıxışı ilə Kolumbiya mətbuatının diqqətini çəkib. O, peşəkar karyerasının əvvəlində "İndependiente Medellin" akademiyasında çıxış edib, həmçinin "Patriotas Boyaka" klubunda oynayıb. Kolumbiyada gözlədiyi imkanları əldə edə bilmədikdən sonra Portuqaliyaya yollanıb və "Estrela da Amadora" ilə "Portimonense" klublarında çıxış edərək adını tanıtmağa başlayıb.

2025-ci ildə "Qarabağ"dan təklif alan hücumçu bu şansı dəyərləndirib və qısa müddətdə klub tarixində iz qoymağa başlayıb. O, xüsusilə ötən ilin 16 sentyabrında "Benfika"ya qarşı oyunda qol və assistlə fərqlənərək komandasının 3:2 hesablı qələbəsində əsas rol oynayıb.

Duranın ilk məşqçilərindən olan Euklides Orexarena onun uşaqlıqdan istedadı ilə seçildiyini və Santa Martada həm fiziki görünüşünə, həm də oyun üslubuna görə "Neymar" ləqəbi ilə çağırıldığını bildirib. Onun sözlərinə görə, Duran sol ayağı ilə fərqlənən məhsuldar hücumçu olub və gənc yaşlarından böyük potensial nümayiş etdirib:

"Santa Martada müəyyən xüsusiyyətlərinə bənzədiyinə görə ona Neymar deyirdilər və böyüdükcə qol vuran, yaxşı sol ayaqla oynayan oyunçu olmağa davam etdi və onun Maqdalena komandasında oynadığını gördükdən sonra Medellinə getməyin vaxtı gəldi. Anasına və ya başqa bir şeyə bağlanmadı. Hər şey orada başladı. O, Antiokiya komandalarında oynadı, departament çempionu idi, amma ona qarşı çox səbrləri yox idi.

Onu Portuqaliyanın ikinci divizionuna getməyə razı saldılar. Əvvəlcə Lusitaniyada, sonra "Estrella Amadorada" oynadı və oradan "Portimonense"yə getdi, orada daha yaxşı müqavilə imzaladı, bir çox oyun keçirdi, qollar vurdu, artıq onu məşq etdirən, bəyənən bir məşqçi tapdı, yaxşı çıxış etdi və bir müddət əvvəl mənə Azərbaycana gedəcəyini dedi. Təəccübləndim və baxın, necə də qaranlıqdan çıxdı”.

"Nyukasl"a vurduğu qol sayəsində Duran bir mövsüm ərzində Çempionlar Liqasında ən çox qol vuran kolumbiyalı futbolçular sırasında Radamel Falcao ilə eyni göstəriciyə çatıb".

Heybət