İran millisi önündə böyük əngəl - Dünya çempionatını buraxa bilər

İran milli komandası viza çatışmazlığı səbəbindən 2026-cı il futbol üzrə dünya çempionatına getməyə bilər.

Publika.az xəbər verir ki, bu barədə "RMC Sport" nəşri məlumat yayıb.

Bildirilib ki, İran Futbol Federasiyasının prezidenti Mehdi Tac mövcud vəziyyətlə bağlı ciddi narahatlığını ifadə edib. O, milli komandanın viza məsələsinin uğurlu həlli üçün zəmanət almaq məqsədilə yaxın günlərdə Beynəlxalq Futbol Federasiyasının (FİFA) rəsmiləri ilə görüş tələb edib.

Mayın 18-də İran yığması Ankaraya yola düşəcək. Orada komanda həm məşq toplanışı keçirəcək, həm də viza üçün barmaq izi verəcək.

Bundan əvvəl İran Futbol Federasiyası 11 iyun - 19 iyul tarixlərində ABŞ, Meksika və Kanadada keçiriləcək dünya çempionatında ölkə yığmasının iştirakı üçün on şərt irəli sürmüşdü. Federasiya vizaların maneəsiz verilməsini, milli komandanın heyətinə, ölkə bayrağına və dövlət himninə hörmət edilməsini, həmçinin hava limanlarında, otellərdə və stadion yollarında yüksək təhlükəsizlik səviyyəsinin təmin olunmasını tələb edib. Qurum vurğulayıb ki, idman nəticələrinə görə turnirə vəsiqə qazanmış İranı heç kim yarışda iştirakdan məhrum edə bilməz.

İran millisi Belçika, Misir və Yeni Zelandiya ilə birlikdə G qrupunda yer alıb. İranlıların iki oyunu Los-Ancelesdə, bir oyunu isə Sietldə keçiriləcək.

Hüseyn İbadlı