Türkiyə nəhənginə görə “Əl-Nəsr”dən gedir: Ronaldoya kömək etmək üçün gəlmişdim

Portuqaliyalı mütəxəssis Jorje Jezuş “Əl-Nəsr”in baş məşqçisi postunu tərk etdiyini açıqlayıb.

Publika.az xəbər verir ki, Səudiyyə Ərəbistanı çempionatının 34-cü turunda “Əl-Nəsr” “Damak”ı 4:1 hesabı ilə məğlub edərək mövsümü birinci pillədə başa vurub və çempion olub. Oyundan sonra 71 yaşlı mütəxəssis komanda ilə vidalaşdığını bəyan edib.

“Mən buraya Kriştiano Ronaldoya və bu klubun qalib gəlməsinə kömək etmək üçün gəlmişdim. Hamımız birlikdə inanılmaz iş gördük. İndi isə mənim üçün ayrılmaq vaxtıdır”, — deyə Jezuş bildirib.

Təcrübəli məşqçi Türkiyəyə qayıdış ehtimalını da istisna etməyib: “Mümkündür ki, “Fənərbağça” ilə yarımçıq qalan bir hekayəm var və onu tamamlamalıyam. “Fənərbağça” azarkeşləri plan qura bilərmi? Bəli, qura bilərlər. Artıq bir maraqlı tərəf var. Təkcə “Fənərbağça” yox, Türkiyədən daha bir klub mənə təklif edib. Türkiyədə üç böyük klub var: “Fənərbağça”, “Qalatasaray” və “Beşiktaş”. Bu üç klubdan ikisi mənə təklif göndərib. İkinci klubun adını isə hələlik gizli saxlayacağam”.

Publika.az