Mbappe məşhur brendlə əməkdaşlığı dayandırır - Səbəb

Fransa millisinin və “Real”ın hücumçusu Kilian Mbappe diqqətini dünya çempionatına hazırlığa yönəltsə də, meydandan kənarda karyerası ilə bağlı mühüm qərar verməyə hazırlaşır.

Publika.az xəbər verir ki, “L’Equipe” nəşrinin məlumatına görə, futbolçu “Nike” ilə əməkdaşlığı dayandırmaq və adı hələ açıqlanmayan yeni bir şirkətlə tərəfdaşlığa başlamaq variantını nəzərdən keçirir. Bildirilir ki, Mbappe “Adidas”, “Under Armour” və “Puma” kimi tanınmış idman brendləri ilə əməkdaşlığı nəzərdən keçirmir.

Mənbənin yazdığına görə, fransalı futbolçunu cəlb edən model Maykl Cordanın “Nike” ilə əməkdaşlığından ilhamlanıb. Məhz həmin tərəfdaşlıq nəticəsində “Air Jordan” brendi yaradılmış və basketbol əfsanəsi şirkətin kommersiya inkişafında birbaşa iştirak edərək tarixdə ən çox qazanan idmançılardan birinə çevrilmişdi.

Məlumata əsasən, Mbappe yeni layihədə sadəcə sponsorluq müqaviləsi bağlayan idmançı olmayacaq. O, brendin inkişafında fəal rol oynayacaq, həmçinin şirkətin böyüməsi və gəlirlərindən pay alacaq.

Bu addım gələcəkdə dünya futbolunun aparıcı ulduzlarının kommersiya tərəfdaşları ilə münasibətlərinin qurulmasında yeni tendensiyanın başlanğıcı ola bilər.