Bosniya və Herseqovina haqda dediyi bu sözlərə görə üzr istədi

“ABC 7 Los Angeles”in müxbiri Ebiqeyl Veles ABŞ komandasının Dünya Kuboku pley-off mərhələsindəki rəqibi haqqında efirdə etdiyi tənqidlərə görə üzr istəyib.

2026-cı il Dünya Kubokunun 1/16 finalında ABŞ Bosniya və Herseqovina ilə qarşılaşacaq.

Publika.az xəbər verir ki, Veles canlı yayımda deyib:

“Xəritədə harada olduğunu göstərə bilmərəm. Bosniya haqqında heç nə bilmirəm və bilmək də istəmirəm. Çünki ABŞ geri döndü və biz əvvəlkindən daha yaxşıyıq. Hazırlaş, Bosniya, çünki bunu istəmirsən, xoşuna gəlməyəcək. Amma sən bunu əldə edəcəksən”.

Bu hissə ABC-nin Los-Anceles filialında yayımlanıb və tezliklə sosial mediada yayılıb. Yayımdan sonra Veles tənqid dalğası ilə qarşılaşdı və jurnalist sosial media hesablarında üzr istədi.

“Dünya Kubokunun rəqabət ruhu kontekstində bir az yumor yaratmaq cəhdi ilə həddindən artıq irəli getdim və efirdə düşünülməmiş, taktikasız və yersiz bir şərh etdim. Bosniya xalqından və Bosniya milli futbol komandasından üzr istəyirəm. Dünya Kuboku dünya icmalarını birləşdirməlidir və sözlərim bu ruhu əks etdirmir. Bütün komandalara turnirdəki gələcək səyahətlərində uğurlar arzulayıram”, – Veles yazıb.

ABŞ – Bosniya və Herseqovina matçı iyulun 2-də Santa Klaradakı “Levi’s” stadionunda keçiriləcək.

Müəllif: Tural