DÇ-2026 zamanı şübhəli mərc - İspaniyanın bu oyununa 4,8 milyon pul qoyulubmuş

İdman yarışlarının manipulyasiyası ilə mübarizə üzrə beynəlxalq müstəqil ekspertlər qrupu 2026-cı il Dünya Kuboku zamanı mərc bazarında qeyri-adi fəaliyyətlə əlaqəli ola biləcək yeddi epizodu müəyyən edib.

Publika.az xəbər verir ki, bu barədə "The Athletic" Avropa Şurasının himayəsi altında idman yarışlarının bütövlüyünü izləyən beynəlxalq ekspertlər və təşkilatlar qrupu olan "Copenhagen Group"un hesabatına istinadən məlumat yayıb.

Ən çox müzakirə olunan məsələlərdən biri ABŞ millisinin hücumçusu Folarin Baloqun ilə bağlıdır. 1/8 final mərhələsinin Bosniya və Herseqovina ilə oyununda (2-0) hücumçu meydandan qovuldu və avtomatik olaraq Belçika ilə növbəti oyunu buraxmalı idi.

Lakin FİFA İntizam Komitəsi sonradan cəzanı dayandırdı və oyunçunu bir il şərti cəzaya məhkum etdi. Daha sonra ABŞ prezidenti Donald Tramp bu məsələ ilə bağlı müzakirələrdə şəxsən iştirak etdiyini açıqladı.

Hesabatın müəllifləri qeyd edirlər ki, Baloqunun qovulmasından dərhal sonra “Polymarket” mərc platforması oyunçunun Belçika ilə matçda oynayıb-oynamayacağı ilə bağlı xüsusi bir mərc xətti açıb.

Lakin FİFA İntizam Komitəsinin qərarı üç gün sonra dərc edildi və turnir ərzində qeydə alınan digər 14 qovulmanın heç biri üçün oxşar mərc xətti açılmadı.

Ekspertlər arasında suallar doğuran digər hadisələr arasında turnirin açılış matçında Cənubi Afrikanın yarımmüdafiəçisi Temba Zvanenin meydandan qovulması, İspaniyanın Kabo-Verdeni məğlub edə bilməyəcəyinə qoyulan qeyri-adi dərəcədə böyük məbləğdə - təxminən 4,8 milyon dollar - mərc (oyun 0-0 hesabı ilə başa çatdı) və İspaniyanın Səudiyyə Ərəbistanı üzərində 4-0 hesablı qələbəsində Ferran Torresin qolunu hesaba almayan üç dəqiqə yarımlıq VAR araşdırması var.

FİFA əvvəllər bildirib ki, onun təhlili Dünya Kubokunda oyunların danışılması və ya idman bütövlüyünün digər pozulması ilə bağlı heç bir dəlil aşkar etməyib. Beynəlxalq Qrupu artıq öz tapıntılarını FİFA -ya təqdim edib və müəyyən edilmiş hər bir hadisə ilə bağlı rəsmi izahatlar almağı gözləyir.

Müəllif: Tural