“Barselona”nın hücum üçlüyü 68 illik rekordu təkrarladı

“Barselona”nın mövsümə startı diqqətçəkən nəticələrlə yadda qalıb. Kataloniya təmsilçisi La Liqanın ilk 4 turunda 17 qol vurub. Bu qolların 14-də Rafinya, Lamin Yamal və Fermin Lopes üçlüyünün birbaşa payı olub.

Publika.az xəbər verir ki, bu göstərici La Liqanın ilk 4 turunda bir hücum üçlüyünün 1958-59 mövsümündən bəri əldə etdiyi ən yüksək nəticələrdən biridir. Həmin mövsümdə “Real Madrid”in Alfredo Di Stefano, Xose Mariya və Ferens Puşkaşdan ibarət üçlüyü ilk 4 turda 15 qol vurmuşdu.

“Barselona”nın kapitanı Rafinya mövsümün əvvəlində xüsusilə məhsuldar çıxış edir. Braziliyalı futbolçu 4 oyunda 6 qol və 1 məhsuldar ötürmə ilə La Liqanın bombardirlər siyahısına başçılıq edir. O, həmçinin klub tarixində La Liqanın ilk 4 turunun hər birində qol vuran üçüncü futbolçu olub. Ondan əvvəl bu göstəriciyə 1953-cü ildə Ladislav Kubala, 2011-12 və 2012-13 mövsümlərində isə Lionel Messi nail olub.

23 yaşlı Fermin Lopes də komandanın hücumunda mühüm rol oynayır. O, 4 turdan sonra 4 qol və 2 assistlə bombardirlər siyahısında üçüncü pillədə qərarlaşıb. Fermin 2011-12 mövsümündə Sesk Fabreqasdan sonra La Liqanın ilk 4 turunda 4 qol vuran ilk ispaniyalı futbolçu olub.

19 yaşlı Lamin Yamal isə 4 qol və 1 məhsuldar ötürmə ilə yanaşı, 4 böyük qol epizodu yaradıb. O, ilk 4 turda ümumilikdə 16 uğurlu driblinq edib. Gənc ulduzun təsiri yalnız qollarla məhdudlaşmır – müdafiəçiləri üzərinə çəkməsi və boşluqlar yaratması da komandanın hücumlarına ciddi təsir göstərir.

“Barselona”nın digər hücum silahlarından biri Entoni Qordon da məhsuldarlığı ilə seçilir. İngiltərəli futbolçu ilk 4 oyunda 4 məhsuldar ötürmə edib. Bu göstərici onun ötən mövsüm “Nyukasl”da 46 matçda cəmi 5 assist etməsi ilə müqayisədə xüsusilə diqqətçəkəndir.

Komandanın yarımmüdafiəçisi Pedri də “Valensiya” ilə oyunda qol vuraraq “Barselona”da ümumi qollarının sayını 29-a çatdırıb və klub tarixinin ən çox qol vuran 100 futbolçusu sırasına daxil olub.

Hazırkı heyətdən Rafinya 81 qolla 33-cü, Lamin Yamal 52 qolla 61-ci, Fermin Lopes 36 qolla 88-ci, Pedri isə 29 qolla 100-cü pillədə qərarlaşıb.