Məğlub olan gürcü rəqibin çənəsini sındırdı - Ömürlük cəzalanacaq

Almaniyanın Leypsiq şəhərində keçirilən komanda cüdo yarışında ciddi insident baş verib.

Publika.az xəbər verir ki, gürcü idmançısı Akaki Caparidze məğlub olduqdan sonra alman rəqibi Timo Kaveliusa hücum edib.

Hadisə sentyabrın 5-də “JC Leipzig”in 8-6 hesablı qələbəsi ilə başa çatan komanda oyunu zamanı baş verib.

Alman cüdoçunun qalib gəldiyi döyüşdən sonra Caparidze hisslərini cilovlaya bilməyib və rəqibinə hücum edib. Hücum nəticəsində Kavelius ikiqat çənə sınığı alıb və iki dişini itirib. O, xəstəxanaya aparılıb və həmin axşam əməliyyat olunub.

Yerli mənbələrə görə, Kavelius qələbədən sonra rəqibinə qarşı təxribatçı bir jest etmiş ola bilər. Lakin bu, heç bir şəkildə sonrakı zorakılığa haqq qazandırmır.

“JC Leipzig” hadisədən şoka düşdüklərini və istintaqa ciddi yanaşmaq niyyətində olduqlarını bildirib. Polis artıq işi araşdırır və hücumun bütün hallarını müəyyən edir.

Bu arada, idman ictimaiyyəti Caparidze üçün mümkün sərt cəzanı müzakirə edir. Gürcü cüdoçusu ömürlük yarışlardan kənarlaşdırıla biləcək uzunmüddətli diskvalifikasiya ilə üzləşə bilər.

Bundan əlavə, Beynəlxalq Cüdo Federasiyasının beynəlxalq səviyyəyə şamil edilə biləcək sanksiyalar tətbiq etmək hüququ var.

Publika.az