“Real”ın ulduzunun hələ doğulmayan övladının adı müzakirə yaratdı

“Real Madrid” və Braziliya millisinin hücumçusu Endrik və həyat yoldaşı, bloqçu Qabriela Miranda San-Pauloda ilk övladlarının dünyaya gəlməsini qeyd etmək üçün şənlik keçiriblər.

Publika.az xəbər verir ki, tədbir zamanı gələcək valideynlər ilk dəfə oğullarının adını açıqlayıblar.

Cütlüyün təxminən 120 qohumu və dostunun qatıldığı şənlikdə qonaqların diqqəti körpənin adının – Kendrikin – həkk olunduğu dekorativ lövhəyə çəkilib. Bu detal tezliklə sosial mediada ən çox müzakirə olunan mövzulardan birinə çevrilib.

İstifadəçilər bu ad seçiminin amerikalı reper Kendrik Lamarla əlaqəli ola biləcəyini ehtimal edirdilər. Bəziləri qərarı orijinal adlandırsa da, digərləri zarafatla oğlanın “artıq səhnə adı ilə doğulacağını” qeyd ediblər. Endrik və Qabrieli özləri niyə məhz bu adı seçdiklərini izah etməyiblər.

Qabriela Mirandanın hamiləliyi bu ilin aprel ayında elan edildi. Cütlük ilk uşaqlarını gözlədiklərini açıqladılar və daha sonra oğlan övladlarının olacağını öyrəndikdən sonra cinsiyyət açıqlaması məclisi keçirdilər. İndi cütlük rəsmi olaraq uşağın adını təsdiqləyib.

Publika.az