Qardi Raşfordu Türkiyəyə gətirir?

“Qalatasaray”da hücum xəttini gücləndirmək üçün aparılan transfer çalışmaları sürətlənib.

Publika.az xəbər veruir ki, bu dəfə “Mançester Yunayted”in ingiltərəli ulduzu Markus Raşford İstanbul klubuna təklif olunub. Daha əvvəl bir çox mühüm transferdə “Qalatasaray”la əməkdaşlıq edən menecer Corc Qardinin ulduz futbolçunu İstanbula gətirə biləcəyini klub rəhbərliyinə bildirdiyi öyrənilib.

Son dörd mövsümdə Türkiyə Super Liqasında çempionluğu heç kimə güzəştə getməyən “Qalatasaray” yeni mövsümə gözlənilməz nəticə ilə başlayıb. İstanbul təmsilçisi doğma meydanda “Çorum” ilə heç-heçə edib və bundan sonra tribunlardan klub rəhbərliyinə qarşı etiraz səsləri yüksəlib.

Azarkeşlərin xüsusilə transfer siyasətinə görə rəhbərliyi tənqid etməsindən sonra “Qalatasaray” çalışmalarını sürətləndirib. Baş məşqçi Okan Burukun da hücum xəttinə mütləq yeni futbolçu istədiyini rəhbərliyə çatdırdığı bildirilib.

Aleksey Batrakovun transferində mühüm irəliləyiş əldə edən “Qalatasaray”ın gündəminə daha bir sürpriz ulduz gəlib. Menecer Corc Qardinin “Mançester Yunayted”də gələcəyi qeyri-müəyyən olan Markus Raşfordu İstanbul klubuna təklif etdiyi bildirilib.

Ötən illərdə “Qalatasaray”ın həyata keçirdiyi bir çox ulduz transferində fəal rol oynayan Gardinin münasib şərtlərin yaranacağı təqdirdə Raşfordun transferini reallaşdıra biləcəyini klub rəhbərliyinə çatdırdığı qeyd olunub.

Ötən mövsümü icarə əsasında “Barselona”da keçirən ingiltərəli futbolçu Kataloniya klubunda diqqətçəkən performans nümayiş etdirib. Raşford 49 oyunda meydana çıxaraq 14 qol vurub və 14 məhsuldar ötürmə edib. Beləliklə, o, ümumilikdə 28 qola birbaşa töhfə verib.

İcarə müddəti başa çatdıqdan sonra “Mançester Yunayted”ə qayıdan ulduz futbolçunun İngiltərə klubundakı gələcəyi isə hələlik bəlli deyil.

“Qalatasaray”da Markus Raşford variantı gündəmə gəlsə də, sol cinah üçün əsas hədəfin dəyişmədiyi bildirilir. Sarı-qırmızılıların prioritetinin Rafael Leao olduğu, Raşfordun isə alternativ ulduz namizədlərindən biri kimi nəzərdən keçirildiyi qeyd olunur.

Transfer pəncərəsinin qalan hissəsində “Qalatasaray”ın hücum xəttinə hansı futbolçunu cəlb edəcəyi sarı-qırmızılı azarkeşlərin ən çox maraq göstərdiyi məsələlərdən biri olaraq qalır.