Əfsanəvi boksçu Afrikada öldürüldü

Boks üzrə iki çəki dərəcəsində keçmiş dünya çempionu Zolani Tete (29-4, 22 nokaut) Cənubi Afrikada öldürülüb.

Publika.az xəbər verir ki, bu barədə “The Sun” qəzeti məlumat yayıb.

Boksçu avqustun 21-də Mdantsanedəki evinin yaxınlığında güllələnib. Onun 38 yaşı vardı.

Polisin məlumatına görə, Tete evə daxil olarkən darvazanın açılmasını gözləyərkən balaklava taxan iki silahlı şəxsin hücumuna məruz qalıb.

Cinayətkarlar idmançıya yaxınlaşaraq atəş açıblar. O, həyətə girərək qaçmağa çalışıb, lakin ölümcül yaralanıb və hadisə yerində ölüb.

Şübhəlilər qaçıblar və heç kim həbs olunmayıb. Polis hücumun səbəbləri ilə bağlı araşdırmalarını davam etdirir.

Tete həmçinin titul döyüşündə ən sürətli nokaut üzrə Ginnesin Dünya Rekordlarına sahib idi. 2017-ci ildə o, Siboniso Qonyunu cəmi 11 saniyəyə məğlub etmişdi.

Cənubi Afrikalı sonuncu dəfə rinqə 2022-ci ildə çıxmışdı. Dopinq testinin müsbət nəticəsi səbəbindən onun dörd illik diskvalifikasiyası iyul ayında başa çatmışdı və Zolani boksa qayıtmağı planlaşdırırdı.