“Yunayted” Mbappedən belə imtina edib - Giqqz illər sonra sirri açdı

“Mançester Yunayted”in keçmiş futbolçusu və məşqçisi Rayan Giqqz klubun Kilian Mbappeni necə rədd etdiyini xatırlayıb.

Publika.az xəbər verir ki, Giqqz bu barədə Rio Ferdinandın şousunda deyib:

“Mən Fransanın cənubunda idim. 2015-ci il idi, “Mançester Yunayted”in məşqçilər heyətində idim. Ətrafda gəzib otelə qayıdırdım. Və hiss etdim ki, kimsə məni izləyir. Otelə çatanda birdən kiminsə mənə tərəf gəldiyini hiss etdim. Bu oğlanın adı Lionel idi, fransız idi. O, yanıma gəldi və dedi: “Salam, mən Lioneləm. Sadəcə salam demək istəyirdim. Mən “Mançester Yunayted”in böyük azarkeşiyəm və sizin də böyük fanatınızam. Amma mən Fransada çoxlu gənclər futbolu izləyirəm və diqqət yetirməli olduğunuz bir oyunçu var. Onun adı Kilian Mbappedir. O, Monakodandır. Düşünürəm ki, o, “Mançester Yunayted”ə uyğun oyunçudur”.

Bir neçə həftə sonra o, bütün məlumatları mənə elektron poçtla göndərdi. Albert Stuyvenberq (o vaxtlar “Mançester Yunayted”, indi isə “Arsenal”da idi) və mən axşamlar oyunçuları izləyirdik. Ona bu barədə danışdım. Və biz “Monako”nun bəzi gənclər oyunlarını izlədik. Düşündük ki, “Vay, bu nədir?” Bilirsiniz, bir oyunçuya baxıb onun xüsusi ola biləcəyini görə bilərsiniz. Mbappe həqiqətən də möhtəşəm görünürdü.

Beləliklə, skaut komandasına Mbappe haqqında danışdıq. Onu izləməyə getdilər və PSJ-yə qarşı oynayırdılar. Bir neçə həftə sonra oğlandan soruşdum: “Necə keçdi?” O dedi: “Ondan əmin deyillər, imtina etdilər”.

Kilian Mbappe hazırda “Real Madrid”in şərəfini qoruyur.

Publika.az