Osimhen nə vaxt meydana qayıdacaq?

“Qalatasaray”ın “Başakşehir”ə səfərdə oynadığı matçda zədələnərək oyunu yarımçıq tərk edən Viktor Osimhenin nə vaxt meydanlara qayıdacağı maraq doğururdu. “Sarı-qırmızılar”ın nigeriyalı ulduzunun yaşıl meydanlara dönüş tarixi dəqiqləşib.

Publika.az xəbər verir ki, müalicəsi sürətlə davam etdirilən ulduz hücumçunun “Trabzonspor”la səfər oyununa qədər hazır olmaq ehtimalı var. Lakin məşqçilər korpusu çətin Qara dəniz səfərində futbolçunu qətiyyən riskə atmaq istəmir.

Osimhenin tam hazır vəziyyətə gəlməsi və zədəsinin təkrarlanmaması üçün böyük ehtimalla milli komandaların oyunları ilə əlaqədar fasilənin başa çatması gözləniləcək.

Milli komandanın rəsmiləri ilə də danışıqlar aparan “Qalatasaray” rəhbərliyi futbolçunun milli fasilə zamanı Nigeriyaya göndərilməməsinə qərar verib. Müalicəsi İstanbulda davam etdiriləcək Osimhen meydanlara UEFA Çempionlar Liqasındakı möhtəşəm qarşılaşma ilə qayıdacaq. Ulduz futbolçu milli fasilədən sonra keçiriləcək kritik “Barselona” matçında formasını geyinəcək və azarkeşləri ilə görüşəcək.

Komandanın digər vacib futbolçusu Mario Lemina üçün də oxşar plan hazırlanıb. Uğurlu çıxış edən yarımmüdafiəçinin də Osimhen kimi heç bir halda riskə atılmaması və yalnız 100 faiz hazır vəziyyətə gəldikdən sonra meydana buraxılması planlaşdırılır.