Ronaldo “Əl-Nəsr”ə “göz dikdi” - 41 yaşlı ulduz unikal plan cızır

Portuqaliyalı hücumçu Kriştian Ronaldo (41 yaş) Səudiyyə Ərəbistanının “Əl-Nəsr” klubunda pay almaq imkanını nəzərdən keçirir.

Publika.az xəbər verir ki, bu barədə “A Bola” məlumat yayıb.

Beş investor qrupu klubun Səudiyyə Ərəbistanının Dövlət İnvestisiya Fondundan alınması ilə bağlı təklif hazırlayır. Konsorsiumun hər bir iştirakçısı ən azı 100 milyon dollar sərmayə qoyacaq. Sövdələşmənin taleyi yaxın iki gün ərzində təcili müşavirədə həll oluna bilər.

Potensial investorlar arasında “RedBird Capital Partners” şirkətinin təsisçisi, amerikalı iş adamı Cerri Kardinale də var. O, “Milan”ın sahibidir və Fransanın “Tuluza” klubuna nəzarət edir. Bundan başqa, qrupa səudiyyəli iş adamları İbrahim əl-Mühəydib, Məhəmməd əl-Xürayci və Şərəf əl-Həriti daxil ola bilərlər.

Sövdələşmə təsdiq olunacağı təqdirdə, Ronaldo tarixdə klubdakı çıxışlarını onun sahibkarı rolu ilə birləşdirən ilk ulduz futbolçu olacaq.

Portuqaliyalı futbolçu 2023-cü ilin yanvarında “Əl-Nəsr”ə keçib və o vaxtdan bəri komandanın heyətində 148 oyun keçirib, 126 qol vurub və 24 məhsuldar ötürmə edib. Onun müqaviləsi 2027-ci ilin yayına qədər nəzərdə tutulub.

Hüseyn İbadlı