Oyunda dava saldı: 17 milyon avroluq maaşının yarısı kəsiləcək

Səudiyyə Ərəbistanının “Əl-Hilal” klubu niderlandlı futbolçu Kresensio Summervillelə bağlı sərt qərar verməyə hazırlaşır.

Publika.az xəbər verir ki, Asiya Çempionlar Liqasında “Əl-Qarafa” ilə oyunda baş verən insidentdən sonra klub rəhbərliyi futbolçunun cəzalandırılması məsələsini nəzərdən keçirir.

“Əl-Hilal” turnirin ilk turunda Qətər təmsilçisini 2:1 hesabı ilə məğlub edib. Lakin qarşılaşma 33-cü dəqiqədə başlayan kütləvi qarşıdurma ilə yadda qalıb. “Əl-Qarafa”nın futbolçusu Abdulrahman Fayez topsuz vəziyyətdə Summervillelə mübahisə edib. Niderlandlı oyunçu buna sərt reaksiya göstərərək rəqibini itələyib.

Daha sonra “Əl-Qarafa”nın futbolçusu İsmael Bennaser hadisəyə müdaxilə edib və Summervillei saçından çəkib. Bundan sonra hər iki komandanın futbolçularının və ehtiyat oyunçular skamyasındakı bəzi şəxslərin iştirakı ilə genişmiqyaslı qarşıdurma yaranıb.

Baş hakim həm Summervilleə, həm də Bennaserə qırmızı vərəqə göstərib. Hadisədən sonra vəziyyət sakitləşib və matç başa çatdırılıb.

Səudiyyə jurnalisti Əbdürrəhman Abaudun sözlərinə görə, “Əl-Hilal” rəhbərliyi yekun qərar verməzdən əvvəl hakim və Asiya Futbol Konfederasiyasının təqdim edəcəyi ətraflı hesabatı gözləyir. Klub həmçinin insidentin baş verdiyi anlara dair əlavə görüntüləri araşdıracaq.

İddia edilən qayda pozuntusunun təsdiqlənəcəyi təqdirdə Summervilleə klubdaxili maliyyə cəzası tətbiq oluna bilər. Bildirilir ki, cərimənin futbolçunun maaşının **50 faizinə qədər** olması ehtimalı var. Bu yanaşmanın daha əvvəl Seneqal millisinin müdafiəçisi Kalidu Kulibalinin üzləşdiyi cəzaya bənzəyə biləcəyi qeyd edilir.

24 yaşlı Summerville ötən yay transfer dönəmində İngiltərənin “Vest Hem” klubundan “Əl-Hilal”a 64,5 milyon avro qarşılığında keçib. O, ildə 17 milyon avro maaş alır.