"Körpə Messi" İspaniyada oynayacaq?

“Mançester Yunayted”in 15 yaşlı yarımmüdafiəçisi, klubun gələcək üçün ən parlaq oyunçularından biri hesab edilən “Körpə Messi” ləqəbli Cey Cey Qabriel eyniadlı klubla danışıqlar aparmaq üçün Barselonaya gəlib.

Publika.az xəbər verir ki, bu barədə Britaniya mediası məlumat yayıb.

Bu, gənc oyunçunun “Qırmızı şeytanlar”ın rəhbərliyini klubdakı qeydiyyatını ləğv etmək tələbi ilə şoka salmasından bir neçə gün sonra baş verib. Onun bu tələbi rəsmi olaraq rədd edilib.

Vəziyyətin xüsusilə dramatik olduğu bildirilir. Məşqçilər heyəti Qabrieli İngiltərə Liqa Kubokunda bu yaxınlarda “Brayton”la keçirilən oyunda heyətə daxil etməyi planlaşdırmışdı. Bu addım 15 yaşlı yarımmüdafiəçini “Mançester Yunayted”in əsas komandası tarixində ən gənc oyunçu edəcəkdi, lakin oyunçunun qəfil demarşı bu planları alt-üst etdi.

İlk xəbərdarlıq əlamətləri ötən həftə Qabriel sosial media profilindəki bütün paylaşımları və şəkilləri heç bir izahat vermədən siləndə ortaya çıxdı. İndi isə onun “Mançester Yunayted”dən ayrılmaq istəyi təsdiqləndi.

Oyunçunun komandası onun müqaviləsinə xitam vermək üçün rəsmi müraciət etdi, lakin klub perspektivli oyunçunu qalmağa razı salmaq üçün bu müraciəti rədd etdi. Lakin Qabriel və nümayəndələrinin İspaniyaya səfəri bu şansları minimuma endirir – onun həm “Barselona”, həm də “Real Madrid”lə danışıqlar aparacağı gözlənilir.

Qabrielin “Mançester Yunayted”lə müqaviləsi cari mövsümün sonuna qədər olsa da, onun xaricə köçməsi üçün hüquqi presedent mövcuddur. Oktyabrın 6-da 16 yaşı tamam olan və AB pasportuna sahib olan futbolçu, FİFA qaydalarındakı xüsusi boşluqdan yararlana biləcək ki, bu da ona adi maneələr olmadan İspaniyanın ən yaxşı klublarına keçməyə imkan verir.