Dünyanın ən böyük displeyi təqdim edildi

“Society for Information Display” tədbirində dünyanın ən böyük displey paneli təqdim edilib.

Publika.az xəbər verir ki, üzvi işıq diodları əsasında hazırlanan dünyanın ən böyük paneli “LG Display” şirkəti tərəfindən layihələşdirilib.

Displey sənayesinin inkişafı istiqamətində hazırlanan ekran 77 düym diaqonal paneli “OLED” matrisası şəffaf və elastik olması ilə diqqət çəkib. İstehsalçı nümayəndələrinin sözlərinə görə, ekranı 80 millimetrlik radiuslu borucuq şəklinə salaraq bükmək də mümkündür.

Təsvir ölçüsü 3840 х 2160 piksel, ekran şəffaflığı 40 faizə bərabər olan displey “Ultra HD/4K” standartlarına uyğun şəkildə hazırlanıb. Panelin içindən displeyin arxasında yerləşən obyektləri görmək olur.

Nümayiş etdirilən displey yalnız bir nüsxədən ibarətdir. Şirkət seriyalı istehsala hazırlaşdığını desə də, displeylərin satışa çıxarılma müddəti ilə əlaqədar heç bir məlumat verilməyib.

Xatırladaq ki, “OLED” panellər ənənəvi maye-kristal (LCD) ekranlarla müqayisədə bir sıra üstünlüklərə malikdir. Belə ki, üzvi işıq diodlar işığı müstəqil şəkildə şüalandırır və bununla onun işıqlandırılmasına ehtiyac qalmır. “OLED” displeylər nazikliyi, çağırışa qısa vaxt kəsiyində cavab verməsi və istehsalının maya dəyərinin yüksək olması ilə xarakterizə olunur.

Könül Cəfərli