İslamiada: Bayraqdarımız qızıl medal qazandı (YENİLƏNDİ)

Azərbaycan karateçisi Rafael Ağayev "Bakı 2017" IV İslam Həmrəyliyi Oyunlarında qızıl medal qazanıb.

75 kq çəki dərəcəsində yer alan 5 qat dünya və 10 qat Avropa çempionu mübarizəyə 1/8 final mərhələsindən başlayıb. Onun ilk rəqibi türkiyəli Erman Eltemur olub. Görüş Ağayevin 3:0 hesablı qələbəsi ilə yekunlaşıb. 1/4 finalda Səudiyyə Ərəbistanından olan Sultan əl-Zəhranini yenən (7:2) R.Ağayev yarımfinalda malayziyalı Şarmendran Raqonatanı da üstələyərək, finala yüksəlib.

Həlledici görüşdə Azərbaycan karateçisi pakistanlı Sədi Qulam Abbasla üz-üzə gəlib və inamlı qələbə qazanıb - 4:0.

Qeyd edək ki, Rafael Ağayev İslamiadada Azərbaycanın bayraqdarı olub.

***

IV İslam Həmrəyliyi Oyunlarının Bakı İdman Sarayında keçirilən karate üzrə kumite yarışında Azərbaycanın kişi idmançıları mübarizəyə qoşulublar.

Publika.az xəbər verir ki, 75 kiloqram çəki dərəcəsində mübarizə aparan idmançımız Rəfael Ağayev ilk görüşdə Türkiyə təmsilçisi Erman Eltemer ilə qarşılaşıb. Azərbaycan idmançısı rəqib üzərində 3:0 hesabı ilə inamlı qələbə qazanıb.

Azərbaycanın ən titullu karateçisi Rafael Ağayev bununla IV İslam Həmrəyliyi Oyunlarında 1/4 finala yüksəlib.

75 kq çəki dərəcəsində mübarizə aparan idmançımız 1/4 finalda Səudiyyə Ərəbistanı təmsilçisi Sultan əl-Zəhrani ilə üz-üzə gəlib.

Gərgin keçən döyüşdə 5 qat dünya çempionu R.Ağayev qələbə qazana bilib - 7:2.

Yarımfinalda malayziyalı karateçi ilə qarşılaşan təmsilçimiz Şarmendran Raqonafanı tam üstünlüklə məğlub edib - 5:0.

Qeyd edək ki, Bakı-2017 İslam Həmrəyliyi Oyunları mayın 22-dək davam edəcək. Yarışlar Azərbaycan paytaxtının 16 idman obyektində 21 idman növü üzrə keçirilir.

Vasif Həsənli