Məşhur aktyor şok vəziyyətində: “Aşağı ətraflarının 90 faizi yanıb”

Vəziyyəti ağır olaraq qalır, hər iki qolu və aşağı ətrafları demək olar ki, 85-90 faiz yanıb. 3 gün ərzində şok vəziyyətindən çıxmalıdır, sonra 2 həftə ərzində bədəni zəhərlənmədən təmizlənəcək. Bu müddətdən sonra səhhəti ilə bağlı həkim məlumat verəcək. Hazırda reanimasiya şöbəsindədir.

Publika.az xəbər verir ki, bu sözləri Əməkdar artist Elnur Kərimov bir neçə gün əvvəl yaşadığı mənzildə baş verən partlayış nəticəsində xəsarət alan aktyor Cavid Telmanın səhhəti haqqında danışarkən deyib. E.Kərimov açıqlamasında bildirib ki, aktyorun sənət dostları mütəmadi olaraq xəstəxana ilə əlaqə saxlayır:

“Cavidin qardaşı Fuadla əlaqə saxlayıb səhhəti ilə maraqlanırıq. “Ata ocağı”, “Baldız” serialının əməkdaşları, Xalq artisti Şamil Süleymanlı onu ziyarət edib. “Ata ocağı” serialının quruluşçu rejissoru Rüfət Şahbazov və prodüser Amiran Babayev Cavidi diqqətdə saxlayırlar. Hadisə baş verən andan etibarən demək olar ki, bütün aktyorlarımız zəng edib həm maddi, həm də mənəvi dəstək olmağa hazır olduqlarını bildirib”.

Əməkdar artist qeyd edib ki, Cavid Telman iki uşaq atasıdır. Hadisə nəticəsində yalnız özü xəsarət alıb, ailə üzvlərinin vəziyyəti yaxşıdır.

“Dua edək ki, Cavid tez bir zamanda sağlamlığına qovuşsun və yenə də öz tamaşaçılarını yeni obrazları ilə sevindirməyə davam etsin. Xəstəxanada çalışan bütün həkim heyətinə də dərin təşəkkürümü bildirirəm”.

Aytən Məftun