5-10 söz əzbərləyib efirə çıxırlar - Oqtay Əliyev

“Televiziyalara elə ekspertlər dəvət edirlər ki, o şəxslər öz fikirlərini ifadə edə, mövzuya uyğun danışa bilir və özünü həmin mövzuda fikir bildirərkən daha rahat hiss edir”.

Bunu Publika.az-a açıqlamasında rejissor, televiziya prodüseri Oqtay Əliyev deyib.

Onun sözlərinə görə, bu gün çox ağıllı, savadlı ekspertlər var: “Sadəcə olaraq deyəsən onlar danışmaqdan çəkinirlər. Sual verirsən, konkret cavab verib kənara çəkilirlər. Mövzunun içindən mövzu çıxarmaq, daha aktiv olmaq kimi məsələləri müşahidə edə bilmirik. Məsələn, jurnalist istənilən bir şəxsdən müsahibə və ya açıqlama almağa çalışarkən sualına “bilmirəm” cavabı alırsa, bir daha həmin adama müraciət etmir. Televiziya proqramlarına elə insanları dəvət etmək lazımdır ki, bir az emosional olsun, danışsın. Danışığı ilə insanların diqqətini özünə cəlb edə bilsin”.

O.Əliyev vurğulayıb ki, Zəlimxan Yaqub efirdə olanda istər-istəməz fikrimiz onun üzərində cəmlənirdi: “Çünki sözdən söz çıxarırdı, emosiyası var idi, oxuyur, danışırdı. Tamaşaçıya da bu lazımdır. Televiziyada müsahiblər emosional, maraqlı və öz işini dərinliyinə qədər bilən şəxslər olmalıdır. Elə ekspertlər var ki, kitabda olan 5-10 sözü əzbərləyib hər dəfə efirdə ondan danışır. Hər dəfə eyni şeyi deyir, eyni terminlərdən istifadə edir. Tamaşaçı sənlə danışmaq, söhbət etmək istəyir, amma bunları görmür. Problemimiz də məhz budur”.