Əməkdar artist: “Hətta bədxah qonşularımız xoş söz yazırdılar” - VİDEO

“90-lar” layihəsində Elnur Həsənov, Akif Hüseynov və başqalarının burada əməyi var. Layihə yutuba yerləşdiriləndə çox yazan oldu. Hətta bizim bədxah qonşularımız belə mahnılarımın altından xoş söz yazırdılar. Onlar belə yaxşı, keyfiyyətli musiqiyə qulaq asırlar, biz isə gedib ən pisini götürürük.

Publika.az xəbər verir ki, bu sözləri Əməkdar artist Lalə Məmmədova Vüsalə Əlizadənin “7 canlı” proqramında qonaq olarkən deyib. Aparıcının bayağı mahnılarla bağlı verdiyi suala cavab verən sənətçi qeyd edib ki, mahnı alarkən həm musiqiyə, həm də sözlərinə fikir verir. Lalə Məmmədovanın sözlərinə görə, bu ikisi bir-biri ilə vəhdət təşkil etməlidir:

“Dinləmirəm deyə, o barədə yalan danışmayacam. Bəlkə onları ifa edənlər gözəl insanlardır, xeyriyyə işləri görürlər. Məni ən çox qıcıqlandıran şey onların şəxsi həyatları ilə bağlı nüansları gündəmə gətirmələridir. İstəyir oxuyur, bunu qadağan edə bilmərik. Həmin o ifaçılar kütləni yaxşı tərəfə də yönləndirə bilər. Bununla məşğul olsalar, daha yaxşı olar”.