Miri Yusif Qarabağda konsert proqramı ilə çıxış edir - Foto

Xalq artisti Miri Yusif Yaşıl Teatrda beş günlük konsert proqramı ilə çıxış edir.

Publika.az Teleqraf-a istinadən xəbər verir ki, Miri Yusif konsertlə bağlı təəssüratını mediaya bölüşüb:

"Bu gün beş günlük konsert proqramımızın ikinci günüdür. İyulun 2-si Azərbaycan Polisi Günü idi və ötən günkü konsert proqramımızı polis əməkdaşlarına həsr edərək onları təbrik etdik. İnanıram ki, bugünkü və qarşıdakı günlərdə keçiriləcək konsertlərimiz də çox gözəl keçəcək. Tamaşaçı marağı çox yüksək olduğuna görə əvvəlcə üç gün nəzərdə tutduğumuz konsert proqramına daha iki gün əlavə etdik. Bu, dinləyicilərimizin bizə olan sevgisinin və etimadının göstəricisidir. Arzum budur ki, konsertlərimizin davamı gəlsin və hər zaman tamaşaçılarımızla görüşək".

Xalq artisti vurğulayıb ki, Qarabağda da geniş konsert proqramı ilə çıxış etməyi planlaşdırır: "Laçında səhnəyə çıxmışam. Yaxın zamanlarda isə Xankəndidə Xalq artisti Röya Ayxan ilə birlikdə çıxışımız olub. İnanıram ki, yaxın gələcəkdə Qarabağda daha böyük konsert proqramımız da baş tutacaq. Mən bu ölkənin vətəndaşı kimi öz borcumu yerinə yetirirəm".