Depardye təcavüzdə ittiham olunur

25 yaşlı kanadalı aktrisa Şarlotta Arnold 72 yaşlı fransalı aktyor Jerar Depardyeni ona təcavüz etməkdə ittiham edib.

Publika.az xəbər verir ki, bu barədə aktrisa tvitter hesabında məlumat yayıb. Paylaşımda deyilir ki, o, Jerarı məhkəməyə versə də, bir nəticə əldə olunmayıb. Şarlottanın sözlərinə görə, o, 2018-ci ildə aktyor tərəfindən iki dəfə zorakılığa məruz qalıb.

"Jerar Depardyenin qurbanıyam. Daha buna səssiz qala bilmirəm. Artıq 1 ildir ki, ona qarşı ittiham irəli sürmüşəm. Lakin o, hələ də işləyir. Həyat məndən 3 il alıb. Səssiz yaşamaq özünü diri-diri dəfn etmək kimidir".

Şarlotta təcavüzdən dərhal sonra polisə müraciət etdiyini bildirib. O, cinayət işinin açıldığını, lakin kifayət qədər dəlil olmadığı üçün işə tezliklə xitam verildiyini qeyd edib. Aktrisa məhkəməyə şikayət etdikdən sonra istintaq yenidən bərpa olunub.

Bəzi mənbələr aktrisa ilə Depardyenin tanış olduğunu (aktyor Şarlottanın atası ilə dost imiş) və ona kino karyerasını qurmaqda kömək etdiyini yazıb. Bildirilib ki, peşəkar məsləhət almaq üçün Şarlotta aktyorun evinə dəvət alıb və hadisə bundan sonra baş verib.

Depardye isə ona qarşı irəli sürülən bütün ittihamları rədd edir.