Hacı Surxay: “Məscidlərin açılması epidemioloji vəziyyətin pisləşməsinə gətirib çıxara bilər”

İlahiyyat elmləri doktoru, İçərişəhər “Cümə” məscidinin axundu, Qafqaz Müsəlmanları İdarəsinin İçərişəhər üzrə səlahiyyətli nümayəndəsi Hacı Surxay Məmmədli pandemiya səbəbindən Aşura mərasimlərinin bu il keçirilməyəcəyini bildirib.

İlahiyyatçı Publika.az-a açıqlamasında bildirib ki, pandemiya vəziyyəti ilə əlaqədar olaraq dünyanın demək olar ki, bütün müsəlman ölkələrində də dini mərasimlərin keçirilməməsinə qərar verilib.

“Müqəddəs məkanlar, kütləvi ziyarət yerləri qapanıb. Hətta hər il milyonlarla zəvvarın ziyarətə gəldiyi Kəbə evi koronavirus səbəbindən mömünləri qəbul edə bilməyib. Məscidlərin açılması ilə bağlı vətəndaşların narahatlığı anlaşılandır. Lakin təcrübələr göstərir ki, ibadət evlərinin kütləvi ayinlərin üçün açılması epidemioloji vəziyyətin pisləşməsinə gətirib çıxara bilər. Aydın məsələdir ki, Aşura ayinlərinin kütləvi şəkildə icrası ölkəmizdə vəziyyətin yenidən pisləşməsinə, karantin rejimininin daha da uzanmasına və ya yenidən sərtləşdirilməsinə səbəb ola bilər. Odur ki, bu vəziyyətdə ehtiyat tədbirlərinə əməl etmək başlıca şərtdir.

Kərbəlada Ər Bein yürüşləri də bu il olmaycaq. Biz yalnız öz dini inanclarımızı deyil, başqalarının həyatlarını da nəzərə almalıyıq. Operativ Qərargahın verdiyi qərarı əsas tutaraq biz qaydalara əməl edirik. Çünki biz bu cəmiyyətdə yaşayırıq. Aşura mərasiminin keçirilməsi üçün yeni media platformasından yararlanmaq mümkündür. Onlayn şəkildə təşkil ediləcək moizələr insanlara evdə oturub dini mərasimdə iştirak etmək imkanı verəcək. Allah bizə səbr etməyi də buyurub, səbr insana verilmiş ən ali duyğulardan biridir. Allah tezliklə bu bəlanı, bu böhranı bütün dünyadan, o cümlədən ölkəmizdən uzaq eləsin”.

İçərişəhər “Cümə” məscidinin axundu yekunda qeyd edib ki, Aşura mərasimini evdə namaz qılmaqla, sədəqə verməklə keçirmək olar:

“Aşura şəhidlik, fəda, vəfa məktəbidir. O, bizə səmimi dəyərləri və dostluq münasibətlərini öyrədir. Biz bunu əsas tutaraq Aşura günündə insanların yanında olmalı, ehtiyacı olanlara bacardığımız qədər yardım etməliyik. İnsanlar evlərində çoxlu namaz qılmalı, dua etməli və sədəqə verməlidir. Bunlar Aşura gününün təzahürüdür. Öz ehtiramımızı bu formatda göstərə bilərik. Hər birimiz evimizdə həm İmam Hüseynə yas saxlamalı, həm də o yardımlaşmanı etməliyik”.

Aytən Məftun