Mövlana haqqında mübahisə yaradacaq iddia: Bu kəlamlar ona məxsus deyilmiş

Türk tarixçi Ümit Doğanın qələmə aldığı “Mövlana Həqiqəti, Mövlananın Bilinməyən Yönləri və Sarsıdıcı Faktlar” adlı kitabda yer alan iddialar müzakirələrə səbəb olub.

Publika.az xəbər verir ki, kitabda Hz. Mövlananın monqollarla münasibətləri və onunla Ahi Evran arasındakı münaqişənin pərdəarxası məqamları qeyd olunub.

Ümit Doğan böyük ictimai müzakirəyə səbəb olacağı gözlənilən kitabla bağlı türk mətbuatına açıqlama verib: "Hz. Mövlana ilə türkmənlərin monqollara qarşı müqavimətinin simvoluna çevrilən Ahi Evran arasında düşmənçilik var idi. Üstəlik, bizi güldürən, düşündürən zarafatları ilə hamının sevimlisinə çevrilən Ahi Evran əslində Nəsrəddin Xocanın özü idi”.

Tarixçinin sözlərinə görə, insanlara Mövlananın sözləriymiş kimi öyrədilən kəlamların demək olar ki, heç biri Mövlanaya aid deyil: “Hətta Mövlananın ümumbəşəri tolerantlıq mesajı kimi bildiyimiz məşhur “Nə olursan ol, yenə gəl” sözü də Mövlanadan əsrlər əvvəl yaşamış başqa bir sufinin sözləridir”.

Roza Şəfiyeva