Səmada QORXUNC ANLAR: bombardmançı təyyarələr TOQQUŞDU - (YENİLƏNDİ)

Rusiya Müdafiə Nazirliyi Uzaq Şərqdə “Su-34”-lərin toqquşması haqqında informasiyanı təsdiq edib.

“Yanvarın 18-də yerli vaxtla saat 08:07-də iki təyyarə plan tədris təlim uçuşu zamanı sahildən 35 kilometrdə Yapon dənizinin akvatoriyası üzərində toqquşub”, - məlumatda deyilir.

Qeyd edilir ki, hər iki təyyarənin ekipajları tullanıb, təyyarələr döyüş komplekti olmadan uçuş həyata keçirirdi.

***

Uzaq Şərqdə Rusiyanın iki “Su-34” qırıcı-bombardmançı təyyarəsi havada toqquşub.

Publika.az xəbər verir ki, bu haqda mənbəyə istinadən TASS agentliyi bildirib.

Mənbəyə görə, hadisə yanvarın 18-i axşam saatlarında baş verib.

“İki “Su-34” dəniz sahilinə yaxın ərazidə uçurdular və onlar havada toqquşdular. Bir təyyarənin ekipajı tullandı. Hər iki ekipajın taleyi haqqında hələ məlumat yoxdur”, - agentliyin materialında deyilir.

Eyni zamanda, “RİA-Novosti” agentliyi şəxsi mənbələrə istinadən bildirib ki, bir “Su-34” təyyarəsi Uzaq Şərqdə radarlardan idib. Jurnalistlərin məlumatına görə, hava gəmisinin ekipajı tullanmağı bacarıb.

Təyyarənin Xabarovsk diyarı və Saxalin arasında Tatar boğazında dənizə düşdüyü təxmin edilir.

“İnterfaks”ın məlumatında isə deyilir ki, hadisə Komsomolsk-na-Amur yaxınlığında baş verib.

Hadisənin digər detalları barədə məlumat yoxdur. Hələlik informasiya rəsmən təsdiqlənməyib.