Şoyqu Ermənistana ciddi xəbərdarlıq etdi - Bu o deməkdir ki...

Ermənistanın Avropa İttifaqına daxil olması onun anti-Rusiya sanksiyalarına qoşulmalı olacağı anlamına gələcək.

Publika.az TASS-a istinadla xəbər verir ki, bu barədə Rusiya Təhlükəsizlik Şurasının katibi Sergey Şoyqu bildirib.

“Ermənistan Avropa Birliyinin sanksiyalarına və hərbi-siyasi qərarlarına, o cümlədən Aİ-nin Ümumi Təhlükəsizlik və Müdafiə Siyasəti kimi vasitələr çərçivəsində qoşulmalıdır”, – deyə o bildirib.

Şoyqu əlavə edib ki, Aİ-yə mümkün üzvlük Ermənistanın iqtisadiyyatına zərbə vuracaq və həm də ölkədə həyat səviyyəsinin aşağı düşməsinə gətirib çıxaracaq.

Xatırladaq ki, yanvarın sonunda Ermənistan Baş naziri Nikol Paşinyan, ölkəsinin Avropa Birliyinə yaxınlaşması məsələsində Rusiya ilə aralarındakı uyğunsuzluqları etiraf edib.

Həmin ayda Ermənistan hökuməti, ölkənin Avropa Birliyinə üzvlük prosesinin başlaması haqqında qanun layihəsini təsdiq edib.

Daha sonra, Ermənistan parlamentinin müvafiq komissiyası, ölkənin Avropa Birliyinə üzvlük niyyətini bildirən qanun layihəsinin ikinci oxunmadan əvvəl müzakirəsini təxirə salıb.

Hüseyn İbadlı