ABŞ-da rus dondurmasını sevirlər?: İdxal üç ilin ən yüksək səviyyəsinə çatdı

ABŞ-da Rusiya istehsalı olan dondurmalara maraq xeyli artıb.

Publika.az xəbər verir ki, bu barədə Rusiya mediası məlumat yayıb. Saytlar ABŞ Milli Statistika Xidmətinin məlumatlarına istinad ediblər. Belə ki, sentyabr ayında ABŞ Rusiyadan dondurma idxalını üç il sonra ən yüksək səviyyəyə çatdırıb.

Sentyabr ayında Rusiya şirkətləri ABŞ-a 167.000 dollar dəyərində məhsul göndəriblər. Bu rəqəm əvvəlki ayın ixrac səviyyəsini 1,8 dəfə, 2024-cü ilin sentyabr ayının göstəricisini isə üç dəfə üstələyib. Sanksiyalar altında olan bu ölkənin ABŞ-a hazırki göstəriciyə bərabər, hətta bundan da çox ixracı sonuncu dəfə 2022-ci ilin aprelində olub.

Xatırladaq ki, üç il əvvəl ABŞ Rusiyadan milyonlarla dollar dəyərində dondurma almışdı. Ruslar 2022-ci ilin sonuna qədər ABŞ-a dondurma göndərməklə 8,4 milyon dollar qazanmışdılar.

Ümumilikdə isə analitiklərin fikrincə, ABŞ bu cür məhsulların idxalını 2025-ci ilin əvvəlindən bəri artırıb. Beləliklə, bu ilin yanvar-sentyabr ayları arasında ABŞ 605.400 dollar dəyərində Rusiya dondurması alıb ki, bu da 2024-cü ilin eyni dövrü ilə müqayisədə xeyli çoxdur.

Tural