Saysız-hesabsız şirkətlərin axını: İran Rusiya bazarını "partlatdı"

2022-ci ildən bəri Rusiyada İran kapitallı və ya bu ölkədə qeydiyyatdan keçmiş şirkətlərin sayı fantastik sürətlə - tam 4,5 dəfə artıb.

Publika.az xəbər verir ki, "Vedomosti" qəzetinin Rusiyanın rəsmi Federal Vergi Xidməti və "Rusprofile" məlumatlarına istinadən yaydığı statistikaya görə, 2021-ci ildə cəmi 99 olan belə şirkətlərin sayı 2026-cı ilin mart ayına olan göstəricilərə əsasən 449-a çatıb. Üstəlik, son illər ərzində İran vətəndaşları və şirkətləri 100-dən çox mövcud Rusiya biznesinə şərik kimi daxil olublar.

İranlı iş adamları əsasən meşə materialları, taxıl ticarəti, meyvə-tərəvəz, eləcə də qəhvə, kakao və ədviyyat bazarına maraq göstərirlər. Beşinci yerdə isə əmlakın icarəsi və idarə edilməsi sahəsində fəaliyyət göstərən şirkətlər qərarlaşıb.

Ekspert Stanislav Lazovskinin fikrincə, bu ixtisaslaşma iki ölkə arasındakı qarşılıqlı ticarət dövriyyəsinin əsas maddələrinə tam uyğundur.

Lakin bu yaxınlaşma fonunda istehlak bazarında ciddi bahalaşma dalğası da başlayıb. Artıq martın əvvəlindən İrandan gətirilən bibər və kabaçkinin qiyməti kəskin artıb.

Proqnozlara görə, yay aylarına qədər İrandan idxal olunan bütün tez xarab olan məhsulların qiyməti daha 10-15 faiz bahalaşacaq.

Adəm