Misirdə kilsə yandı: 41 ölü, 25 yaralı

Misir Daxili İşlər Nazirliyi Qahirədə kilsədə baş verən yanğının kondisionerin alışması nəticəsində baş verdiyini bildirib.

Publika.az xəbər verir ki, bu barədə Misirin “Əl-Məsri əl-Youm” qəzeti məlumat yayıb.

“Məhkəmə-tibbi ekspertiza göstərib ki, kilsə binasının ikinci mərtəbəsində sinif otaqlarının yerləşdiyi kondisioner sistemində yanğın baş verib”, - məlumatda deyilir.

Qeyd olunub ki, kondisioner “elektrik naqilində nasazlıq nəticəsində” yanıb, bu da çoxlu sayda ölüm və xəsarət alanların əsas səbəbi olan “böyük miqdarda tüstünün yayılmasına” səbəb olub.

Hadisə şahidlərinin nəşrə verdiyi məlumata görə, səhər saatlarında elektrik enerjisində fasilə yaranıb, bundan sonra generatorun qoşulmasına qərar verilib, cərəyan boşalması kondisionerin alışmasına səbəb olub. Nəşrin həmsöhbətlərinin sözlərinə görə, tüstü sürətlə bütün kilsəni bürüyüb və insanlar huşlarını itiriblər. Bəziləri özünü xilas etmək üçün pəncərədən atıb.

Qeyd edək ki, Qahirədə Əbu Sifin kilsəsində baş verən yanğında 41 nəfər dünyasını dəyişib, 25 nəfər yaralanıb.

Murad