HƏMAS UDUZDU: Qəzzada hakimiyyət onlara təhvil verilir

Radikal HƏMAS hərəkatı Qəzza zolağına nəzarəti Fələstin Milli Administrasiyasına (PNA) verməyə hazırdır.

Publika.az xəbər verir ki, bu barədə Britaniyanın "Sky News Arabia" telekanalı öz mənbəsinə istinadla məlumat yayıb.

HƏMAS Fələstin Azadlıq Təşkilatına (FAT) ünvanladığı məktubda Qəzza zolağının idarəçiliyini Fələstin Administrasiyası və hökumət komissiyasına təhvil verməyə hazır olduğunu bildirib.

Telekanalın həmsöhbəti qeyd edib ki, HƏMAS hakimiyyətin Fələstin Milli Administrasiyasına ötürülməsi üçün yeni administrasiyada işçilərin iş yerlərinin qorunub saxlanmasını və ya maaşlarının ödənilməsi zəmanəti ilə təqaüdə göndərilməsini şərt qoyub.

Mövcud məlumata görə, hakimiyyətin Fələstin Milli Administrasiyasına təhvil verilməsi qərarı Qahirədə son danışıqlar zamanı Misirin güclü təzyiqindən sonra HƏMAS liderləri tərəfindən qəbul edilib.

Fevralın 17-də yəhudi dövlətinin müdafiə naziri İsrael Katz bəyan edib ki, İsrail öz varlığını təhdid edə biləcək Fələstin dövlətinin yaradılmasına icazə verməyəcək.

Bundan əvvəl ABŞ dövlət katibi Qəzza zolağında sülh naminə HƏMAS-ın kökünü kəsməyə çağırıb.

Hüseyn İbadlı