HƏMAS Trampın təklifinə "HƏ" DEDİ, amma...

Fələstin radikla HƏMAS hərəkatı silahlarını BMT-nin himayəsi altında Misir və Fələstin təhlükəsizlik qüvvələrindən formalaşdırılacaq xüsusi quruma təhvil verməyə hazır olduğunu bəyan edib.

Publika.az xəbər verir ki, bu barədə "Al Hadath" telekanalı məlumat yayıb.

Kanalın hərəkatdakı mənbəsi bildirib ki, radikal qruplaşma ABŞ Prezidenti Donald Tramp tərəfindən hazırlanmış Qəzza planının müddəalarının tezliklə həyata keçirilməsində maraqlıdır.

Mənbənin sözlərinə görə, İsrail bu təşəbbüsün reallaşmasına “mane olmağa” çalışır və anklava bombardımanı dayandırmaqdan imtina edir. Mənbə əlavə edib ki, HƏMAS Qəzzada saxlanılan bütün sağ israilli girovları bir gün ərzində azad edə bilər. Həlak olmuş girovların qalıqlarının təhvil verilməsi üçün isə “əlavə vaxt” tələb olunur və ABŞ bu məsələdə “elastiklik” göstərməyə hazırdır.

"Al Hadath" dəqiqləşdirib ki, Qəzzada olan HƏMAS rəhbərliyinin üzvləri istədikləri halda anklavı tərk edə bilərlər və Vaşinqton onların təhlükəsizliyinə və gələcəkdə sui-qəsdlərə məruz qalmayacaqlarına zəmanət verir. Hərəkat bu məsələlərlə bağlı hələlik rəsmi açıqlama verməyib.

Hüseyn İbadlı