HƏMAS sülh sazişinin imzalanması mərasimində iştirakdan İMTİNA ETDİ

Fələstin radikal HƏMAS hərəkatı Qəzza zolağında atəşkəs sazişinin imzalanması mərasimində iştirakdan imtina edib.

Publika.az "Le Figaro" nəşrinə istinadla xəbər verir ki, bu barədə qruplaşmanın siyasi bürosunun üzvü Husam Badran məlumat verib.

Badran bildirib ki, sülh danışıqları məsələsində HƏMAS Qətər, Misir və Türkiyə kimi vasitəçilərə güvənəcək.

Qəzza zolağında atəşkəs münasibətilə “Sülh Sammiti” Misirin Şarm əl-Şeyx şəhərində bazar ertəsi, 13 oktyabr tarixində keçiriləcək.

9 oktyabrda ABŞ Prezidenti Donald Tramp bəyan edib ki, İsrail və HƏMAS Qəzza zolağında nizamlanma ilə bağlı sülh planının ilk mərhələsi üzrə razılaşma imzalayıblar. Amerika lideri qeyd edib ki, bu razılaşma çox yaxın zamanda bütün girovların azad olunmasını və İsrail qoşunlarının razılaşdırılmış xətlərə çəkilməsini nəzərdə tutur.

Həmin gün HƏMAS-ın Qəzza zolağındakı rəhbəri Xalil əl-Hayya bildirib ki, razılaşma çərçivəsində İsrail hakimiyyəti bütün fələstinli qadın və uşaqları azad edəcək. Onun sözlərinə görə, ümumilikdə 250 məhbus və 1,7 min anklav sakini azadlığa buraxılacaq.

Hüseyn İbadlı