Müdafiə Nazirliyindən itkin düşmüş hərbçimizlə bağlı SON DƏQİQƏ AÇIQLAMASI

"Bu gün baş verən hadisə ilə bağlı onu deyə bilərəm ki, Kəlbəcər rayonunun Alagöllər sahəsində hava şəraitinin qəfil dəyişməsi və çovğun səbəbindən xidməti vəzifələrini yerinə yetirən 4 nəfər hərbi qulluqçularımız baş leytenant Bağırov Fuad Allahverdi oğlu, müddətdən artıq həqiqi hərbi xidmət edən hərbi qulluqçumuz kiçik çavuş Hüseynov Cavad Rauf oğlu, əsgər Hüseynov Maşallah Rövşən oğlu və əsgər Kərimov Yasin Yavər oğlu ərazidə istiqaməti itirərək azıblar".

Publika.az-ın verdiyi xəbərə görə, bunu jurnalistlərə açıqlamasında Müdafiə Nazirliyinin Mətbuat Xidmətinin rəhbəri polkovnik-leytenant Anar Eyvazov deyib. Müdafiə Nazirliyinin sözçüsü bildirib ki, bu hərbi qulluqçuların tapılması üçün dərhal təxirəsalınmaz tədbirlər həyata keçirilib:

"Ərazinin çətin relyefli yüksəkliklərdə və qarla örtüləsini nəzərə alaraq oraya kifayət qədər şəxsi heyət və texnika cəmləşdirilib. Axtarış işlərinə cəlb olunan şəxsi heyətin İsti çay və isti yeməklə təmin edilib. Aparılan axtarışlar nəticəsində bu gün səhər saatlarında kiçik çavuş Hüseynov Cavad Rauf oğlu, əsgər Hüseynov Maşallah Rövşən oğlu və əsgər Kərimov Yasin Yavər oğlu tapılıb. Onlar dərhal Kəlbəcərdəki hərbi hospitala yerləşdiriliblər. Onlara ixtisaslaşdırılmış tibbi yardım göstərilib. Həkim nəzarətindədiər. Hazırda onların həyati təhlükəsi yoxdur. Baş leytenant Fuad Bağırovun tapılması məqsədi ilə axtarış-xilasetmə tədbirləri davam etdirilir"